Margot Robbie dhe Jacob Elordi udhëheqin grupin e aktorëve në përshtatjen interesante të klasikut "Lartësitë e stuhishme", nga regjisorja fituese e çmimit Oskar Emerald Fennell (Promising Young Woman), që sjell një qasje të freskët dhe moderne ndaj një prej historive më të famshme të dashurisë së të gjitha kohërave. Në malësitë e largëta e të rrahura nga erërat e Anglisë, mes dy shpirtrave të trazuar, Kethit e Hithklifit, lind një pasion që sfidon gjithçka, arsyen, moralin dhe shoqërinë. Dashuria e tyre, po aq e fuqishme sa edhe shkatërrimtare, shndërrohet në një obsesion që përndjek breza dhe shkatërron gjithçka që i rrethon.
E udhëhequr nga fituesit e çmimit Oskar Russell Crowe dhe Rami Malek, si edhe nga kandidati Michael Shannon, Nuremberg është një thriller i fuqishëm që tregon historinë e ngritjes së gjyqeve historike kundër anëtarëve të komandës së lartë naziste për krimet e luftës të kryera gjatë Luftës së Dytë Botërore. Filmi bazohet në librin e lavdëruar të Jack El-Hait, The Nazi and the Psychiatrist. Fill pas mbarimit të Luftës së Dytë Botërore, ndërsa bota përpiqet të kuptojë tmerrin e Holokaustit, psikiatri ushtarak amerikan, major Dagllas Kelli, ngarkohet me detyrën e jashtëzakonshme për të vlerësuar gjendjen mendore të Herman Gëringut, ish-marshalli famëkeq i Rajhut dhe zëvendësi i Hitlerit, si edhe të zyrtarëve të tjerë nazistë të nivelit të lartë. Por së shpejti ai gjendet i mbyllur në një duel psikologjik me Gëringun, karizma dhe dinakëria e të cilit nxjerrin në pah një të vërtetë tronditëse: se edhe njerëzit e zakonshëm janë të aftë të kryejnë të këqija të paimagjinueshme.
Në vazhdimin e filmit provokues dhe plot tension "Groenlanda: Streha e fundit" nga viti 2020, filmi "Groenlanda 2: Shtegtimi" na çon në një udhëtim plot pasiguri, një udhëtim në të cilin e gjithë familja Gariti, sërish e udhëhequr nga Gerard Butler, duhet të niset! Ngjarjet zhvillohen pesë vjet pasi kometa Klark ka goditur Tokën dhe ka shkatërruar pjesën më të madhe të planetit. Familja Gariti, që mbijetoi duke u fshehur në një bunker në Groenlandë, përballet me sfida të reja. Djali i tyre, Neitani, tani adoleshent, lufton me vështirësitë e jetës nën tokë dhe me hapësirën e kufizuar. Për këtë arsye, familja vendos të braktisë sigurinë e dukshme të bunkerit dhe të niset në kërkim të një shtëpie të re në Europën e shkatërruar dhe plot rreziqe.
